بيىلدان باستاپ تيميريازەۆ اۋدانىنىڭ 10 مىڭعا جۋىق تۇرعىنى گيگيەنالىق تالاپتارعا سايكەس كەلەتىن تىرشىلىك ءنارىن تۇتىنا الادى.
ۇلكەن قۋانىشقا كەنەلگەن ەلدى مەكەندەردىڭ بىرى–دميتريەۆكا. وسىندا تۇراتىن 600-گە جۋىق تۇرعىن كوپ جىلدان بەرى اۋىز سۋدى تاسىپ ىشەتىن. ەندى اۋىل ىشىنە سۋ كولونكالارى تارتىلىپ, كەز كەلگەن ۋاقىتتا پايدالانۋعا بولادى. 300-دەي تۇرعىنى بار دزەرجينسكي اۋىلى دا سۋدى تاسىپ جەتكىزەتىن ماشاقاتتان ءبىرجولا قۇتىلدى.
ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى ازامات ەلەۋسىزوۆتىڭ ايتۋىنشا, وبلىستىق قازىنادان 59 ميلليون تەڭگە ءبولىنىپ, 38 شاقىرىم سۋ تاراتۋ جەلىلەرى قالپىنا كەلتىرىلگەن.
«بىلتىر اۋداندا سۋ تاراتۋ جەلىلەرىن قايتا جاڭارتۋ, رەزەرۆۋارلاردى جوندەۋ جۇمىستارى جۇرگىزىلىپ, 114 سۋ تاراتۋ كولونكاسى, قوسىمشا 7 قۇدىق ورناتىلدى. بيىل 45 شاقىرىم سۋ تاراتۋ جەلىلەرى قالپىنا كەلتىرىلىپ,167 قۇدىق قويىلادى. دوكۋچاەۆو, درۋجبا, جارقىن, بەلوگرادوۆكا اۋىلدارىندا سۋ تاراتۋ جەلىسى مۇلدەم بولماعاندىقتان قايتا سالىندى», دەيدى اۋداندىق قۇرىلىس, ساۋلەت جانە تۇرعىن ءۇي-قۇرىلىس ءبولىمىنىڭ جەتەكشىسى ايبەك قورجىنباەۆ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى